जगण्याचे स्वप्न

_____ जगण्याचे स्वप्न _____
÷÷÷÷÷÷÷÷÷÷÷÷÷÷÷÷÷÷

खोल डोळ्यात
एक स्वप्न घेऊन-जगण्याचे
ती धुंडाळतेय
अंधारवाटा....
चाचपडत,
धडपडत,
अडखळत....

खचत नाही ती
संकटांनी,
भूकेने,
तहानेने...

मात्र,
गर्भगळीत होते
वासनांध नजरांनी
अन्
तिचे स्वप्न
चकनाचूर होते-
शीलाबरोबरच!

* अनिल सा.राऊत *
         📱9890884228
                  ( गारवामधून )
÷÷÷÷÷÷÷÷÷÷÷÷÷÷÷÷÷÷÷÷÷

मातीचे नाते

______ मातीचे नाते ______
÷÷÷÷÷÷÷÷÷÷÷÷÷÷÷÷÷÷

माझ्या फुफ्फूसात
निघेल कदाचित,
फक्त चिमूटभरच माती-
श्वासाबरोबर आत गेलेली...
जणू,
माझ्या सर्वांगातच
मुरली आहे माती-
अगदी,
मी तिच्या कुशीत
विसावेपर्यंत!

                 * अनिल सा.राऊत *
         📱9890884228
                  ( गारवामधून )
÷÷÷÷÷÷÷÷÷÷÷÷÷÷÷÷÷÷÷÷÷

हिशोब

______ हिशोब _______
÷÷÷÷÷÷÷÷÷÷÷÷÷÷÷÷

हाल-अपेष्टा
भोगल्या तिनेही
पण,
नाही मागितला कधी
त्याचा हिशोब-
आपल्याच अंकुरांना!

आज....
अंकुराचे झाड होताच
लावला जातो हिशोब-
जीर्ण देहाच्या
सांभाळाचा,
दवा-पाण्याचा,
अजून कशा-कशाचा....!

ती मात्र,
काहीच उणे करत नाही
आपल्या
न मागितलेल्या हिशोबातून
अन्
शिवतही नाही कधी
तिच्या मनाला-
उपकाराची भाषा
किंवा
असला व्यवहारिकपणा!

              * अनिल सा.राऊत *
         📱9890884228
                  ( गारवामधून )
÷÷÷÷÷÷÷÷÷÷÷÷÷÷÷÷÷÷÷÷÷

घास

_____ घास _____
÷÷÷÷÷÷÷÷÷÷÷÷

उनाड पिल्ल्यांची
बखोटी धरुन
त्यांच्या चोचीत
घास भरवताना
आपली भूक
विसरून जाते,
चिमणी...!

तिच्या पोटातील कावळे
तेव्हाही शहाणेच होते-
कर्तव्याच्या जाणिवेने...
आणि
आजही शहाणेच आहेत-
परावलंबित्त्वाच्या असहाय्यतेने!

         * अनिल सा.राऊत *
         📱9890884228
                  ( गारवामधून )
÷÷÷÷÷÷÷÷÷÷÷÷÷÷÷÷÷÷÷÷÷

झालो कधीचा मी दिवाना

रूप तुझं सोळा आणे,डोळ्यात गं माईना
विचार माझ्या नजरंला,कशास पाहिजे आईना....
तुला बघून...तुला बघून
झालो कधीचा मी दिवाना।।धृ।।

रेशमी तुझ्या केसांची,पाणीदार डोळ्यांची
लालचुटूक ओठांची,मोरपिशी स्पर्शाची
नशा मनातून गं जाईना...
तुला बघून...तुला बघून
झालो कधीचा मी दिवाना।।१।।

चाल तुझी ठेक्याची,जवानीच्या मस्तीची
जादू तुझ्या नजरेची,मदिरेच्या धुंदीची
करी बेहोश सारा जमाना...
तुला बघून...तुला बघून
झालो कधीचा मी दिवाना।।२।।

ओढ तुझ्या मिठीची,पहिल्या गं भेटीची
काया तुझी रुप्याची,आस दावते रातीची
ती चंदेरी रात काही येईना...
तुला बघून...तुला बघून
झालो कधीचा मी दिवाना।।३।।

ही सांज गं मोक्याची,समजू नको धोक्याची
तुझ्या माझ्या प्रेमाची,बात घडवू लाखाची
तुझ्यावाचून क्षण ही जाईना...
तुला बघून...तुला बघून
झालो कधीचा मी दिवाना।।४।।

📝 गीत-अनिल सा.राऊत 📝
    📱9890884228

गजल

गजल
✒✒✒✒✒✒✒

वृत्त-मंजुघोषा
लगावली-गालगागा गालगागा गालगागा

दार माझ्या काळजाचे वाजलेले
रान सारे खंजिरांनी माजलेले!

आज साक्षीला कसा सांगा उभारु ?
काल माझे तोंड त्यांनी दाबलेले!

ठार बापा मारण्याला तेच आले
जोजवाया दूध ज्यांनी पाजलेले!

रीत न्यारी या जगाची पाहतो मी
छाटले का हात त्यांनी राबलेले?

भाकरीसाठी किती जाळू जवानी
नाव सार्थकी तुझे मी लावलेले!

* अनिल सा.राऊत *
📱9890884228

किती खाल्ल्या असतील खस्ता

°°°°°°°°°°°°°°°°°°°°°°°°°°°°°°°°

::::::: किती खाल्ल्या असतील खस्ता ::::::::

सांगत्ये तुम्हाला बाई

आता तुमचं मी ऐकत नाही

जन्म दिला तुम्हां ज्यांनी

त्यांना मी बोझ्या मानत नाही

अन्

आधार त्यांचा तोडत नाही...

जी..जी..जीजी..जी -Female

आता कसं तुला समजावु

सांग कुठवर मी गं धावू

पगार काही वाढत नाही,

         खर्च त्यांचा झेपत नाही...

गं..गं..गंगं..गं-Male

आता तुमचं मी ऐकत नाही,

आधार त्यांचा तोडत नाही...

जी..जी..जीजी..जी -Female

किती खाल्ल्या असतील खस्ता

जन्मापासुनि वाढवत असता

गणित असलं पटत नाही,

आता तुमचं मी ऐकत नाही...

नाही..नाही..नाही-Female

चिमण्या पिलांसाठी अपुल्या

टाचा बघ किती झिजल्या

तुम्हांसाठीच धावत राही,

रात रात मी झोपत नाही...

गं..गं..गंगं..गं-Male

आता तुमचं मी ऐकत नाही,

आधार त्यांचा तोडत नाही...

जी..जी..जीजी..जी -Female

सारं आयुष्य त्यांनी झिजवलं

तरी तुम्ही दारात बसवलं

ही फेड कुणाला चुकत नाही,

आता तुमचं मी ऐकत नाही...

नाही..नाही..नाही-Female

किती हुशार तू गं राणी

आलं डोळ्यात माझ्या पाणी

हाल त्यांचं बघवत नाही,

जन्मदात्यांना विसरत नाही...

गं..गं..गंगं..गं-Male

आता तुमचं मी मोडत नाही,

साथ तुमची सोडत नाही...

जी..जी..जीजी..जी -Female

जन्म दिला मला ज्यांनी

त्यांना मी बोझ्या मानत नाही...-Male

सांगत्ये तुम्हाला बाई

साथ तुमची सोडत नाही...

साथ तुमची सोडत नाही...-Female

°°°°°°°°°°°°°°°°°°°°°°°°°°°°°°°

अनिल सा.राऊत

9890884228

anandiprabhudas@gmail.com

दे ललकारी

°°°°°°°°°°°°°°°°°°°°°°°°°°°°°°°°

::::::: दे ललकारी ::::::::

भेदिले अवकाश,लांघिले सागर
नाही राहिली तू अबला...
गिरीशिखरावरती पाय रोवूनि
दे ललकारी या जगाला..।।धृ।।

खांद्याला खांदा लावूनि
डोळ्याला डोळा भिडवूनि
         शूराने रक्षिते सीमेला..।।१।।

चूल आणि मूल सोडूनि
सारी बंधने झूगारुनि
         ठोकरले तू गुलामीला..।।२।।

बुद्धीचा कस लावूनि
पुरुषांना फिके पाडूनि
         दिलास धक्का वर्चस्वाला..।।३।।

कुणी कल्पना होऊनि
आकाशी झेप घेऊनि
         फडकावते तिरंग्याला..।।४।।

समानता ही जाणूनि
साथ मी तुला देऊनि
         सलाम करतो यशाला..।।५।।

कर्तृत्त्वाला मान देऊनि
शौर्याची जाण ठेऊनि
         अभिमान तुझा देशाला..।।६।।

भेदिले अवकाश,लांघिले सागर
नाही राहिली तू अबला...
गिरीशिखरावरती पाय रोवूनि
दे ललकारी या जगाला..

°°°°°°°°°°°°°°°°°°°°°°°°°°°°°°°

अनिल सा.राऊत
9890884228

anandiprabhudas@gmail.com

तेवते एक पणती

°°°°°°°°°°°°°°°°°°°°°°°°°°°°°°°°°

::::: तेवते एक पणती :::

सूर्य जरी तुज हाती,अंधार दाटतो पाठी...

तेवते एक पणती,लेक होऊनि तुझ्यासाठी।।धृ।।

असेल जरी अंशाचा,दिवा तुझ्या वंशाचा

नाग जहरी दंशाचा,फणा काढुनि तुझ्यापाठी।।१।।

तेवतेे एक पणती,लेक होऊनि तुझ्यासाठी...

सोसले किती तू हाल,केला उभा महाल

झालास तू रखवाल,अपुल्याच घरासाठी।।२।।

तेवते एक पणती,लेक होऊनि तुझ्यासाठी...

का करितो हव्यास,मनी मुलाचा ध्यास

गर्भात मुलीचा -हास,सांग करितो कशासाठी।।३।।

तेवते एक पणती,लेक होऊनि तुझ्यासाठी...

खुडू नको कळीला,जन्म घेऊ दे मुलीला

देह सासरी वाहिला,जीव तुटतो बापासाठी।।४।।

तेवते एक पणती,लेक होऊनि तुझ्यासाठी...

सोसते रे सारे काही,तुझ्याच नावापायी

तरी तुला तमा नाही,कोण सोसतो कुणासाठी।।५।।

तेवते एक पणती,लेक होऊनि तुझ्यासाठी...

घे सतीचे वाण हाती,भाळी लावून माती

वाढू दे हरेक पोटी,एक मुलगी देशासाठी।।६।।

तेवते एक पणती,लेक होऊनि तुझ्यासाठी.....

°°°°°°°°°°°°°°°°°°°°°°°°°°°°°°°°°

अनिल सा.राऊत

9890884228

anandiprabhudas@gmail.com

देव माझा अरणमंदिरी

सावता गीतमाला गीत क्र.६

:::: देव माझा अरणमंदिरी :::::

आहे देव माझा अरणमंदिरी

बोला हरी हरी...बोला हरी हरी।।धृ।।

टाळ चिपळ्यांचा भजनि गजर

भक्तांवरी त्याची कृपेची नजर

देई अभय,नाव लावे किनारी...।।१।।

कष्टाचिया गावा नामात दंगता

धावे विठोबा,सांगे संत सावता

अरणक्षेत्री वसे दुजी पंढरी...।।२।।

मनोभावे माथा ठेवितो चरणी

संताचाही संत,झाला शिरोमणी

पंढरीनाथ करी अरण वारी...।।३।।

आहे देव माझा अरणमंदिरी

बोला हरी हरी...बोला हरी हरी....

©अनिल सा.राऊत

9890884228

धाव धाव सावता...

सावता गीतमाला गीत क्र.५

:::: धाव धाव सावता :::::

धाव धाव सावता....धाव धाव सावता
संकटांनी आता पुरा घेरलो।।धृ।।

तुझ्या कृपेची सावली
असू दे सदा माऊली
नको रे दु:खाची छाया
असू दे सुखाची माया...
         असू दे सुखाची माया
तुझ्या चरणाचा दास जाहलो।।१।।

कुणी बोलते टाकून
कुणी सोडतो दावण
झाला डोंगर दु:खाचा
घास मुकला सुखाचा...
         घास मुकला सुखाचा
किती धरु धीर मी रे हरलो।।२।।

फूले करितो घामाची
माला ओवितो नामाची
तरी का देवा पावेना
ठाव जीवा या लागेना...
         ठाव जीवा या लागेना
सांग कुठे देवा कमी पडलो।।३।।

वाढे श्वासाचे अंतर
आस तरी निरंतर
ये ना मज भेटायला
जसा तुज विठू आला...
         जसा तुज विठू आला
भेट तुझी घेण्या जगी उरलो।।४।।

धाव धाव सावता....धाव धाव सावता
संकटांनी आता पुरा घेरलो....

©अनिल सा.राऊत
9890884228

लाडाच्या मैने...

लावणी 

हौशी माझी बया,तिला नेलं फिराया

बघून तिची काया,भरला जादा किराया

तरी टांगा काय हलंना,

बसला तिथंच फसुनि जी जीजी जी

टांगंवाला गेला हसुनि

अन्

मैना माझी बसली की हो रुसुनि...हो होहो हो...

आगं आगं बायने,लाडाच्या मैने

काय आपरुक तुला गं टांग्याचं...

चारीन माझ्या हातचं 

         तुला भरीत रोज वांग्याचं।।धृ।।

चालत थोडं जाऊया

सिलमा दौड पाहुया

दुखलं पाय जरी

गेल्यावर घरी

चोळीन मोठ्या पिरमानं

         लावून तेल माक्याचं।।१।।

अशी नकं रुसू गं

हटकून बसू गं

बाईल त्याची देखणी

पुरवतो लाड म्हणूनि

नकं सांगूस तू

         कौतुक मला त्या चांग्याचं।।२।।

ऐक माझं थोडं

हेका तुझा सोड

येळ चालली निघून

कानात ठेवतो सांगून

घेईन तुला हावसंनं

         घड्याळ मोठ्या ठोक्याचं।।३।।

गुणाची माझी मैना

रुसवा आता गं सोडना

घे पावडर लाली आयना

रुप तुझं गं डोळ्यात मायना

असंच चितार येऊ दे पोटी

         साल हाय लय मोक्याचं।।४।।

आगं आगं बायने,लाडाच्या मैने

काय आपरुक तुला गं टांग्याचं...

चारीन माझ्या हातचं 

         तुला भरीत रोज वांग्याचं.....

*अनिल सा.राऊत*

9890884228

आठवण

::::::: आठवण :::::::

ये गं ये गं साजणे...ये गं ये गं साजणे
आठवण तुझी जीव घेतेया।।धृ।।

मन बेचैन बेचैन
कुठे पडेना चैन
सैरभैर झाला जीव
वाट पाहती नयन
तुझ्या वाटेवरी फूले वाहतोया।।१।।

किती करशी बनाव
काय तुला म्हणावं
किती छळशिल आता
कशी येईना कणव...
माझ्या श्वासाची दोर तुटतेया।।२।।

घेतो मिटुनि पापणी
नको वहावया पाणी
प्रेमाची गं त्या अपुल्या
सांग जगाला कहाणी
नको रडू आता वेळ गेलिया।।३।।

ये गं ये गं साजणे...ये गं ये गं साजणे
आठवण तुझी जीव घेतेया....

*अनिल सा.राऊत* 9890884228

वाढदिवस शुभेच्छा (१)

शुभेच्छा क्र.१

आले आभाळ भरुन
थेंब पावसाचे घेऊन
सरी बेभान नाचती
गाणे जन्मदिनाचे गाती...

थेंब इवले मिळून
होई सागर तो महान
तैसा सागर व्हावे तू
क्षण क्षण बहरावे तू

हसू कायम असू दे
दु:ख संकट ते नसू दे
हेच देवाशी मागणे
ना पडो तुज काही उणे

लाभो उदंड आयुष्य
आनंदी उज्ज्वल भविष्य
पूर्ण होवो साऱ्या इच्छा
वाढदिवसाच्या शुभेच्छा!!

*अनिल सा.राऊत
9890884228

anandiprabhudas@gmail.com

भक्तीचे फळ

सावता गीतमाला गीत क्र.४

भक्तीचे फळ

उरी सावताच्या ब्रम्हांड पाहिले

फूल आत्म्याचे चरणी वाहिले।।धृ।।

नाही उपास-तापास

नाही केला वनवास

ना पायी चालण्याचे कष्ट साहिले

उरी सावताच्या ब्रम्हांड पाहिले

फूल आत्म्याचे चरणी वाहिले।।१।।

नाही नवस-सायास

नाही नैवेद्याचा वास

ना पोथ्या-पुराणाचे वाचन केले

उरी सावताच्या ब्रम्हांड पाहिले

फूल आत्म्याचे चरणी वाहिले।।२।।

नाही आकांड-तांडव

नाही शोभेचा मांडव

ना जप-तपाचे हिशोब ठेविले

उरी सावताच्या ब्रम्हांड पाहिले

फूल आत्म्याचे चरणी वाहिले।।३।।

उरी वसले सावता

ना राहिले भय आता

भक्तीचे फळ मुक्तीठायी लाभले

उरी सावताच्या ब्रम्हांड पाहिले

फूल आत्म्याचे चरणी वाहिले।।४।।

©अनिल सा.राऊत

9890884228

anandiprabhudas@gmail.com

लाख अर्पिले नाम

सावता गीतमाला गीत क्र.३

लाख अर्पिले नाम

लाख अर्पिले नाम तेव्हा देव पावला

संत सावताच्या भेटी विठ्ठल धावला।।धृ।।

थेंब थेंब घामाचा

विठ्ठलनामाचा

मातीमायच्या चरणी

अभिषेक वाहिला...

संत सावताच्या भेटी विठ्ठल धावला...१

भक्त सारे सारखे

विठू तव पारखे

सावता माळी भासला

पांडुरंगा आगळा...

संत सावताच्या भेटी विठ्ठल धावला...२

जाती कैक पंढरी

दिंड्या वारकरी

परि सावताच्या रानी

रोज चाले सोहळा...

संत सावताच्या भेटी विठ्ठल धावला...३

ना खंड कधी नामाला

भाव वाहिला कामाला

असा विरळा संत

शिरोमणी रे जाहला...

संत सावताच्या भेटी विठ्ठल धावला...४

लाख अर्पिले नाम तेव्हा देव पावला

संत सावताच्या भेटी विठ्ठल धावला.....

©अनिल सा.राऊत

9890884228

anandiprabhudas@gmail.com

राया एकदा तरी फिरुद्या मर्जी (लावणी)

(लावणी)

किती सांगा करु मी तुमची अर्जी
राया एकदा तरी फिरु द्या मर्जी...||धृ||

नजरेच्या खेळाची पुरे हो जुगलबंदी
घ्या बावनकशी ही जवानी कवळ्यामंदी
फिरुनि पुन्हा,घडू द्या गुन्हा,नको कसली नाराजी...||१||

शिणगाराची लाली गडद झाली बाई
अजून कशी का तुमची चाहुल न्हाई
पेचात पडले,काय कळेना,कशी तुम्हां करु राजी...||२||

हट्टाने मी बिलगेन तुम्हां,नका करु दूर
सोडा रुसवा,मला हसवा,लाजून मी चूर
पिरतीपायी तुमच्या राया,घालेन `ऐवज´ खर्ची...||३||

(चाल:-तुम्हांवर केली मी मर्जी बहाल ...चिञपट:-पिंजरा)

©अनिल सा.राऊत
9890884228
anandiprabhudas@gmail.com

सोळाचा खेळ (लावणी)

सोळाचा खेळ बाई मी मांडून बसले
चोळीवरनं पदर बाई मी सारुन बसले ।।धृ।।

पाखरे भिरभिरती...भान हरपती
दाणा नसल्याजागी...चोची ते मारती
असं ज्वानीचं जाळं बाई मी लावून बसले ।।१।।

भुंगे फिरफिरले...फूल फुलले
गुलकंद चाखण्या...किती टपले
भिंगरी बांधून पायी मी फिरवू लागले ।।२।।

रात सरता सरेना...मना चैन पडेना
देह तापला आगीत...भडका विझता विझेना
अशी होऊन बेभान पाणी शोधत सुटले ।।३।।

भेटले बहुजन...कोल्हे जागवून
राती परतल्या...रस चाखून
डाव टाकून उलटा मी फड जिंकून आले ।।४।।

©अनिल सा. राऊत
9890884228
anandiprabhudas@gmail.com

कळावी तुला प्रीत माझी

सखे सर ही पावसाची,भिजवी मनाला
कळावी तुला प्रीत माझी,अशा क्षणाला।।धृ।।

बघ डोळ्यात माझ्या
काय तुला दिसते? -M
     नको रे साजणा
     मन इथेच फसते -F
सांग ना तू मला
ही कोकाळा का गाते? -F
      बघून तुला अन् मला
      सख्याला ती पुकारते -M

जुळली मने तुझी माझी,सांग ना जगाला
कळावी तुला प्रीत माझी,अशा क्षणाला ।।१।।-M

मन चिंब झाले
तनू कोरडी का?-F
       ये जवळी साजणे
       दूर तू खडी का?-M
शहारले अंग माझे
भरली हुडहुडी का?-F
        ये मिठीत तू अशी
        घडू दे लाख चूका-M

फुलला देही अंगार कसा,सांग ना तू मला-F
कळावी तुला प्रीत माझी,अशा क्षणाला ।।२।।-M

धूंदला रे पाऊस
धुंद तू अन् मी-F
       सरावल्या धारा
       चिंब तू अन् मी-M

सख्या सर ही पावसाची,भिजवी मनाला-F
कळावी तुला प्रीत माझी,अशा क्षणाला ।।३।।-M

©अनिल सा.राऊत
9890884228
anandiprabhudas@gmail.com

चांदण्याची रात साजणी

चांदण्याची ही रात साजणी,चल आज गाऊ प्रीतगाणी।।धृ।।-F
बहराची ही वेळ सुहानी,उमलून आली रातराणी।।धृ।।M

रात सारी आज गंधाळली
धरा दुधी साज पांघरली

मिलनाची ही वेळ सुहानी,खुणवून गेली ही पापणी।।१।।-F

चंद्र झुकला गालावरती
मीठीच्या गं खुणा उमटती

धुंदण्याची ही रात साजणी,मनी लाजते एक कामिनी।।२।।-M

श्वासात श्वास मिसळती-F
शब्द सारे ओठात विरती-M

गुंतण्याची ही रात सुहानी,सजवून गेली प्रीतगाणी।।३।।F&M
चांदण्याची..........

(कडवे स्ट्रक्चर:-सांग कधी कळणार तुला)

©अनिल सा.राऊत
9890884228
anandiprabhudas@gmail.com

कळले नाही,जडले प्रेम कसे?

हळव्या या माझ्या मनाला....साथ तुझी दे ना-M
खुलल्या या प्रेमकळीला....गंध तुझा दे ना-F

भाव मनातले सांगू कसे?
पाण्यावरती तरंग जसे
चिमटीत पाणी घेऊ कसे?
भाव शब्दात मांडू कसे?
.........कळले नाही,जडले प्रेम कसे?-M

आसमंत हा सुगंधी झाला
गंध प्रेमाचा दरवळला
का स्वप्नात मी घेई उसासे?
जागेपणी तुझी आस असे..
.........कळले नाही,जडले प्रेम कसे?

स्पर्श तुझा शहारतो अंग
भेटीतही मग भरतो रंग-M
मिठीत तुझ्या रे जादू असे
झाले तुझीच मी सांगू कसे?-F
.......कळले नाही,जडले प्रेम कसे?-F&M

(मला वेड लागले प्रेमाचे टच)

©अनिल सा.राऊत
9890884228
anandiprabhudas@gmail.com

धुंद अशा वेळी...

धुंद अशा वेळी...धुंद अशा वेळी
तुझी आठवण मज यावी
त्या क्षणी भेटीस तू ये ना...
हवा पावसाळी
भिजवत सुमनांना यावी
त्या क्षणी मिठीत तू ये ना...M

पडता थेंब देही
बावरे मन होई
ध्यास हा तुझा
    लागतो उगी का कळेना?...F

धुंद अशा वेळी..........M

ओढ मिलनाची
थकल्या नयनांची
पायघड्या केल्या
सखे नजरेच्या.....M

माझ्या अंतरीची
स्पंदने ह्रुदयाची
तेजीत ओढीने
तुझ्याच भेटीच्या.....F

सांगू जरा ओल्या मीठीला
भिजुनि जावी मने.....M

सूर नवे जुळवूनी रोज
गावू प्रेमाचे गाणे.....F

धुंद अशा वेळी........M

(चाल:-ओल्या सांजवेळी)

©अनिल सा.राऊत
9890884228
anandiprabhudas@gmail.com

पोवाडा

पोवाडा

अत्याचाराच्या अंध:कारात,काळोखाला चिरण्याला
      सूर्य जन्मला...सूर्य जन्मला
रामजी भिमाईच्यासाठी
घडली गोष्ट एक मोठी
चौदावे रत्न आले पोटी-हां जी जी

नव्हता माणूस म्हणत माणसाला
शिवाशिवीने कहर केलेला
      लाज वाटावी त्या पशूला
असा वागवत होता माणूस माणसाला
कराया उद्धार तयांचा भिमराव जन्मला...
         भिमराव जन्मला-हां जी जी

अडाणीच होता समाज ठेविला
थोडे बहू जे शिकले,बसून ओसरीला
     तयांनीही मुरडली नाके समाजाला
भिमरावांनी घेतला वसा नाही टाकिला
केले प्राशन म्हणुनी वाघिणीच्या दुधाला...
      वाघिणीच्या दुधाला-हां जी जी

किर्ती अशी कर्तृत्त्वाने झळाळली
         चमकली ज्ञानाने
मग संबोधु लागला समाज
         बाबासाहेब नावाने
कौतुक किती ते लोकां
          माझे बाबा...माझे बाबा
फेकले देव देव्हाऱ्यातुनी
         बसविले त्या जागी बाबा
शिकलेल्या बाबांनी तयांना
        सांगितले मग पटवून-२
शिक्षणाने माणूस होतो
     शहाणा की रे,व्हा शहाणे शिकून-२

अन्यायाला फोडली वाचा
अस्पृश्यतेला धिक्कारले
अज्ञानाची फोडली कोंडी
सर्वांबरोबर शिक्षण केले...

शिक्षणाची दारे खुली झाली आणि काय चमत्कार झाला...(बोल)

एका हाकेला,साथ बाबाला-२
      समाज एकवटला
      निर्धार केला...
अरे चला शिकायला
साथ द्याया बाबाला
अन् लाथ पेकटात व्यवस्थेच्या घालायला-हां जी जी

दुखले किती जरी पोटात
   नाही माघारी,शिक्षणाच्या दारी
बघून जोश तो अस्पृश्यांचा
   होई तीळपापड उच्चवर्णियांचा
अन् शिकुनि शहाणा होई तो अनुयायी बाबांचा-हां हां

पाण्यासारखे निर्मळ कोणी
जगात नाही,वादच नाही
परि पाण्यालाही केले तयांनी पापी
म्हणे शिवाशिवीने देव तयांचा कोपी
हा भेद पाहुनी का देवही गेले झोपी....हा जी हा जी

चिडला तो ज्ञानसूर्य अन्
दिली हाक समतेची
समाजाच्या एकतेची
अस्पृश्यांच्या उद्धाराची

ऐतिहासिक निर्णय बाबांनी घेतला
पाण्याला त्या हस्तस्पर्श केला
अन् पवित्र केले त्या पापी पाण्याला
केले अमर महाडच्या त्या चवदार तळ्याला-हां जी जी

वाढवित होते ज्ञानाला
चेतवित होते मरगळलेल्या मनाला
अजून सल एक होती त्या क्षणाला
शिका,संघटित व्हा
     करा संघर्षाला
जन्म दिला ब्रीदवाक्याला
अंगार मना-मनात चेतला
अत्याचाराविरुद्ध सारा समाज पेटला-हां जी जी

तुटल्या साऱ्या बेड्या
शतकानुशतकाच्या गुलामीच्या
घेतला श्वास मोकळा
फुगल्या बरगड्या छातीच्या-हो-हो
जोखड मानेचे गळून पडता,ताठा कण्याला
अन् काय बिशाद कुणाची भिडवाया डोळा डोळ्याला-२

सोसले हाल खूप झाले
नाही आता रमले
मन बाबांचे,ज्या धर्माने दुखावले
मार्ग तो सापडला
अन् गेले शरण गौतमाला...हां जी जी

भारत जेव्हा स्वतंत्र झाला
दिला जन्म बाबांनी घटनेला
देवून मागासांना हक्काचे आरक्षण
झाले बाबांचे महापरिनिर्वाण...

समाजहितासाठी समता,न्याय,बंधुता त्रिसूत्री जोपासावी
ज्ञानसूर्याची स्वप्ने आता,तुम्ही पूर्ण करावी

चैत्यभूमीला त्या वंदन करुनि मनोभावे-२
अनिल लिहीतो पोवाड्याला,तुम्ही स्मरणाने गावे-२

(आधार:-तुळापुरी कैद झाला...)

©अनिल सा.राऊत
9890884228
anandiprabhudas@gmail.com

पाऊस सोहळा

गूज पक्षांची कानी
पाय रानात रुतला
सूर कोकिळा प्याली
कंठ झाडाला फुटला

गाज वाऱ्याची पानी
झुला खोप्याचा झुलला
माय दिसता क्षणी
बंध चोचीचा खुलला

साज फुलांचा रानी
गंध मातीला सुटला
जीव लावूनि त्यासी
रस भ्रमरे लुटला

गातो ओहोळ गाणी
रंग मोरांनी भरला
नभ वाकता खाली
ठेका सरींनी धरला

भासे बिल्लोरी पाणी
सूर्य तळ्यात दंगतो
असा सोहळा भारी
नित्य नव्याने रंगतो!

©अनिल सा. राऊत
9890884228
anandiprabhudas@gmail.com

मिरुग

       
गड गड गडगड
काळे मेघ गर्जती
घण् घण् घणघण
घंटा शाळेची वाजती

दप्तर पाठी घेऊनी
धूम ठोकली तोऱ्यात
पाऊस धावे शिवाया
धूळ चालली डोळ्यात

पळता पळता बाई
दम लागला उरात
नजर धावली मागे
ठेच लागली जोरात

तोल जाता आपटले
थेंब धावले जोमात
पाठशिवणीचा खेळ
चालला बाई झोकात

आला आला पाऊस
भिजले सारे दफ्तर
काट्यात फसुनि झाले
गणवेशाचे लक्तर

वाटेला लावून डोळे
माय उभी दारात
चिंब भिजले मी अन्
पाणी गळे छपरात

कुशीत घेऊनि माय
बोलली मजला काही
हात जोडूनि आभाळा
`मिरुग' पावला बाई!

©अनिल सा. राऊत
9890884228
anandiprabhudas@gmail.com