हे बंगल्याच्या दारांनो...!

हे बंगल्याच्या दारांनो,
किती झिडकाराल माणुसकीला?
जरा डोळे उघडून बघा-
गुदमरू लागलाय श्वास `माणुसकीचा´!
जरा मोकळ्या हवेत बघा...
लांब कशाला?
माझ्या झोपडीतच बघा-
माणसांची चाहुल लागताच
डे-यावरच्या तांब्याला
चिमुकले पाय फुटतात,
दाराला नसलेला उंबराही
नतमस्तक होतो स्वागतासाठी!
चहाचं पातेलं
किणकिणत चुलीवर जावून बसतं...
मग,
चुलीलाही स्फुरण चढतं ;
म्हणते,
``जेवूनच जावा आत्ता!´´
एवढंच काय,
शेजारी-पाजारी कुणाला
आलाच सांगावा देवाचा-
तर-
डे-यावरचा तांब्या
गडागडा लोळतो,
चहाचं पातेलं
आंघोळच करीत नाही,
चूल तर बंडच पुकारते
आणि
माणसांच्या पोटातील कावळे
गायब होतात तीन-तीन दिवस!
हे बंगल्याच्या दारांनो,
असं घडतंय का कधी-
तुमच्या `आत´मध्ये ?


*अनिल सा.राऊत*
9890884228