प्रेमाचा शेवट

::::: प्रेमाचा शेवट :::::

नभातल्या सोडुन तारका नभी,मी चंद्र होऊन आलो

चांदणस्पर्शाने मोहोरली तू अन् मी शहारुन आलो!

इथे तिथे काय पाहतेस हृदयात बघ डोकावून

गर्दगुहा ती अंधारी मी सखे केव्हाचा उजळून आलो!

बहाणे लाख कर तू प्रेम नसल्याचे मजवरी आता

नजर मध्यस्थ झाली अन् जीव जीवास लावून आलो!

धडकणे हृदयाचे तुझ्या श्वासागणिक वाढते आहे

हवाहवासा एक अंगार अंतरी मी चेतवून आलो!

काय भरोसा कधी बदलेल दिशा हवेची अचानक?

जा वाहत कुठेही,प्रेमकण मी हवेत पेरुन आलो!

अमर तसे काही नाही इथे या नाशिवंत दुनियेत

प्रेमाचा तोही शेवट उघड्या डोळ्यांनी मी पाहून आलो!

          ✒अनिल सा.राऊत

             📱9890884228

शाश्वती

:::::: शाश्वती :::::

हीच जगाची रीत आहे तुला कळणार केव्हा?

सांग ना सखे तू रंग तुझा बदलणार केव्हा?

होय...तुझ्या नसा-नसात मीच वाहतोय आज

पण तू थेट आसवे बनून वाहणार केव्हा?

अजून तरी ताजेच आहे हृदयात गुलाब

विस्कटून पाकळ्या चुरगाळून जाणार केव्हा?

हातात गुंफूनि हात झाला आता जमाना जरी

क्षणात बेसावध क्षणी झिडकारणार केव्हा?

डोस प्रेमाचा आजचा,रे उद्याचा विरहरोग

सांग तमाम घोर काळजाला लावणार केव्हा?

जुळल्या तारा..ग्रहांची कोण कधी देतो शाश्वती?

ठरवून अंदाज माझे खोटे,कायमची येणार केव्हा?

        ✒अनिल सा.राऊत

              📱9890884228

विरह आभाळा झाला!

::::: विरह आभाळा झाला :::::

आज काळजाचा पार चोळामोळा झाला
पाहिलेल्या स्वप्नांचा पालापाचोळा झाला!

दुरावण्या दोष ना तुझा,ना माझा होता
वावटळीचा चेहरा मात्र काळा झाला!

सुटला हात नि क्षणात पाऊस आला
जणू तुझा-माझा विरह आभाळा झाला!

नको वाहूस भार माझ्या आठवणींचा
वचनभंग असाच कैक वेळा झाला!

घाव इतके खोल की डोह जीवघेणा
मीठभरणास गाव सारा गोळा झाला!

आलीस तू घेऊन अक्षता हाती जेव्हा
मांडवाचा सये लालेलाल डोळा झाला!

किती सजवताय मला बोहल्यावरी
वाटते माझाच आज बैलपोळा झाला!

         ✒अनिल सा.राऊत
              📱9890884228

पाळणा

::::::::: पाळणा ::::::::::

सुमनेपोटी गर्भ राहिला।साऱ्या घराला आनंद झाला
दिसामासी गर्भ वाढिला।।

कानोकानी खबर गेली।सुमनेची माय धावुनि आली
डोहाळपूर्ती तिने हो केली।।जो बाळा जो रे जो...१

नवमास भरता आल्या कळा।जन्म दिला गोंडस बाळा
हर्षाने तिच्या पाणी आले डोळा।।

बाळ गोमटा पाहुनी सुंदर।मनी एकच आला विचार
कुळाचा अपुल्या करील हो उद्धार।।जो बाळा जो रे जो...२

बाराव्या दिवशी बारसे केले।पाळण्याला पुष्पहार गोवले
नाव सुलभ शाम ठेविले।।

चंद्रकलांनी बाळ वाढले।पाय त्याचे पाळण्यात दिसले
रुप मनोहर मनी हो ठसले।।जो बाळा जो रे जो...३

पहिल्या वर्षी टाकले पाऊल।जग जिंकायाची लागली चाहूल
हर्ष मनात दाटला विपुल।।

नाना कळांनी अंगण फुलले।दुडूदुडू चालीने बाळ धावले
माता-पिता ते धन्य हो झाले।।जो बाळा जो रे जो...४

सहाव्या वर्षी दिवस पहिला।शिक्षणाचा त्याने श्रीगणेशा केला
धडा ज्ञानाचा पहिला गिरविला।।

गुरुचा त्याने आदर केला।बुद्धीचा पुरावा सादर केला
रागाने कधी ना उद्धार हो केला।।जो बाळा जो रे जो...५

बाराव्या वर्षी बारा भानगडी।कृष्ण समजुनि शाम करितो खोडी
गोपिकांना लावतो लाडीगोडी।।

शाळेचे त्याने गोकुळ केले।हुशारीने गोपींना भुलविले
कौतुके श्रीराम शाळेत हो गेले।।जो बाळा जो रे जो...६

अठराव्या वर्षी परिवर्तन झाले।बाळ शाम तरुण झाले
ध्यान बगळ्याचे लावून बसले।।

झाली कैकदा दिलाची गोची।आपटल्या पाण्यावरी चोची
नाही गवसली पोर हो कुणाची।।जो बाळा जो रे जो...७

चोविसाव्या वर्षी तरारले मन।सुरु जाहले वधूसंशोधन
सप्तजन्माचे बांधण्या बंधन।।

दिस रोजचा लागला ढळाया।लागल्या शामला निशा छळाया
तरुणी लग्नाच्या लागल्या हो टाळाया।।जो बाळा जो रे जो...८

एकोणतीसाव्या वर्षी मांडव दारी।जीवनी आली सुलभा धन्वंतरी
भरुन निघाली जीवनाची दरी।।

सुखाचा त्यांनी संसार केला।कळी सुंदर आली वेलीला
नाही पारावार आनंदाला हो उरला।।जो बाळा जो रे जो...९

वाढता वाढे बाळाचे वय।पकडली आता शब्दांची लय
काव्याने दिले प्रसिद्धीचे वलय।।

प्रवास इथपर्यंतचा मांडून झाला।शुभेच्छा आता पुढच्या प्रवासाला
पाळणा असा हा अनिलने हो लिहिला।।जो बाळा जो रे जो...१०
...............................................
(साहित्यातला एक जुना प्रकार "पाळणा" लिहीण्याचा हा प्रयत्न!)

          ✒अनिल सा.राऊत
              📱9890884228

रातराणी

::::::: रातराणी :::::::

सांज ढळता ढळता
रोज नवीच कहाणी
होते तरुण कलिका
गाते सुगंधाची गाणी!

किती लाजाळू लाजाळू
गर्द अंधाराची राणी
साद घालण्या साजणा
शृंगारते रानी वनी!

भाळी गोंदन गोंदन
ओल्या दवाचे रेखुनी
गंधाळल्या गोंदावरी
शोभे कुंकूम चांदणी!

लागे चाहूल चाहूल
वाजे पाऊल रे कानी
होता जाणिव भासाची
दाटे नयनात पाणी!

अंगी शहारा शहारा
उठे नित्य स्पर्शातुनी
वाहते अनिलासवे
तिची अधूरी कहानी!

किती विरह विरह
सोसावा रोज दिनी
सखे,तरी पुन्हा पुन्हा
उमलते रातराणी!

        ✒अनिल सा.राऊत
              📱9890884228

भिंती

::::: भिंती :::::

थोडा
मी ही घेतलाय विसावा
तेव्हा...याच वृद्धाश्रमात!
.
.
आज
आलाय वाट्याला
कायमचा मुक्काम...याच वृद्धाश्रमात!
.....तेव्हा,
मी पुसले नव्हते अश्रू
बापाच्या डोळ्यातले...
आणि
कळली ही नव्हती वेदना
बाप असण्याची!
.
.
आज,
हिशोब पूर्ण झालाय...
मात्र,
उद्या?
उद्या ढासळायला हव्यात
या वृद्धाश्रमाच्या भिंती!
...माझ्यातल्या बापाचे
काळीज बोलतेय असे...
.
.
कदाचित,
माझ्याही बापाचे काळीज
असेच बोलले असेल..
पण,
कुठे ऐकले या भिंतींनी?

       ✒अनिल सा.राऊत
         📱9890884228

आठवणी

:::::: आठवणी :::::

रुततात
आठवणी जेव्हा
काळजात...
मी
वेचून वेचून
काढतो
सलणाऱ्या आठवणी!
पण,
उरलेल्या आठवणी तरी
कुठे असतात
मुलायम?


           ✒अनिल सा.राऊत
             📱9890884228

चारच क्षण

:::: चारच क्षण :::

तुझ्या भेटीचे
चारच क्षण
आले वाट्याला...

दोन क्षणांनी
लावली ओढ
माझ्या जीवाला...

दोन क्षणांचे
टिश्यूकल्चर
केले मुद्दाम...
हो..पुनर्जन्म
व्हावा म्हणून
आठवणींचा!

✒ अनिल सा.राऊत
📱9890884228

येडीखुळी झाली पोरं सखुबायच्या नादानं!

::::: येडीखुळी झाली पोरं सखुबायच्या नादानं :::::


वाजव रं डीजे जरा वाजव रं जोमानं
येडीखुळी झाली पोरं सखुबायच्या नादानं।।धृ।।

नागिणीवाणी चाल तिची गोरं गोरं गाल
कातळ काया करी दिलाचं रं हाल
मागं मागं फिरुनि जीव झाला हैराण।।१।।

बघून तिला काळीज लागतंय झुरायला
गल्लीभवती पोरं फिरती लाईन मारायला
कडक पहारा तिच्यावरती ठेवलाय बापानं।।२।।

आयन्याम्होरी उभी राहुनि करी खाणाखुणा
नादी तिच्या लागता हाती येई तुणतुणा
तिच्यापायी जमीन सारी फुकली म्हादानं।।३।।

आस लावुनि फासा टाकुनि दमले गाव
जवानीचे फूल तोडण्या रंक झाले राव
बाईल येडे मजनू गेले बाराच्या भावानं।।४।।

नजरेचा तीर तिच्या लागावा जिव्हारी
म्हणूनि गाव सारे,धावा करी श्रीहरी
काकड आरतीला गाती प्रेमाचंच गाणं।।५।।

        ©अनिल सा.राऊत
            📱9890884228

अभंग-सज्जनाला जाच लाजण्याचा

:::::::: अभंग-सज्जनाला जाच लाजण्याचा ::::::::

झाले भोंदू फार । साहित्य मंदिरी
गर्व तो अंतरी । फुकाचा रे ।।१।।

चार दोन शब्द । होताच प्रसन्न
लेखिती कदान्न । गुरुलाही ।।२।।

माज ऐसा कधी । नको दाखवाया
गेले कैक वाया । गुर्मीत या ।।३।।

अपुलेच हात । घेई पाठीवरी
थोपटण्या बरी । पडते रे ।।४।।

शेणावरी गोटे । न टाकी शहाणे
ते बुजगावणे । ऐटखाऊ ।।५।।

उथळ बाजारी । नागव्यांचा नाच
सज्जनाला जाच । लाजण्याचा ।।६।।

काय चाळे प्रभो । दावतो आम्हांशी
नाते माकडांशी । लालेलाल ।।७।।

      ✒अनिल सा.राऊत
         📱9890884228

सालीची होली (हास्यकविता)

सालीची होली (हास्यकविता)

साली माझी आली
लय लय लाडात
वाटलं बिचाऱ्या मनाला
घ्यावं हिला घोळात...

बायकोही तशी 
काही वाईट नाही
पण सालीसारखी
सॉलिड टाईट नाही...

जे जवळ नसतं
तेच मनाला हवं असतं
सालीच्या मनातलं मात्र
कधीच कळत नसतं...

कधी करते म्याव म्याव
तर कधी क्वाय क्वाय
पण म्हणाली काल खरी
उद्या करुया होली एन्जॉय...

आज येतानाच ती
आली होती रंगून
तिला पाहून दिल
गेलं माझं हरकून...

तिच्या सौंदर्याचा
भयानक असर पडला
माझ्याच बायकोचा
मला विसर पडला...

बहाणा करुन रंगाचा
आवळून तिला धरलं
नाव सालीचं घेऊन
आय लव यू म्हटलं...

रंगात रंगलेलं थोबाड
ओळखू नाही आलं
बायकोनं लागलीच
थोबाड माझं रंगवलं...

दूर उभी राहून साली
करत होती बाय बाय
आता पुढच्या वर्षीही
करुया होली एन्जॉय..!

      ✒अनिल सा.राऊत
       📱9890884228

.........तेव्हाही अन् आताही!

:::::::: .........तेव्हाही अन् आताही! :::::::

मी न माझा राहिलो कधी
.........तेव्हाही अन् आताही!

बोलते ओठांनी,भेटते नयनांनी
.........तेव्हाही अन् आताही!

सत्यात टाळते,स्वप्नात छळते
.........तेव्हाही अन् आताही!

कारणे लाख परत फिरण्यासाठी
.........तेव्हाही अन् आताही!

हातात गंध बघ प्रेमाचा उरलेला
.........तेव्हाही अन् आताही!

मी सैरभैर दाही दिशांचा प्रवाशी
.........तेव्हाही अन् आताही!

तू मस्त मजेतली स्वच्छंद मैना
.........तेव्हाही अन् आताही!

        ✒अनिल सा.राऊत
         📱9890884228

अभंग

:::::::: अभंग :::::::

तुझा अभिषेक । नाहीच थांबला
नाहीच लांबला । युगे युगे ।।१।।

पाठी-पोटाची रे । करुन चिपळी
तुझिच भूपाळी । गातो रंक ।।२।।

उदासला वारा । रुसले आभाळ
पुजला दुष्काळ । पाचवीला ।।३।।

संकटे धाडूनि । निवारती तेच
मतांसाठी पेच । नीच सारे ।।४।।

तसाच तुझा रे । दिसे मज कावा
भक्तांसाठी पावा । गाजराचा ।।५।।

औंदा तरी जाग । थोडा तरी लाज
घुमू दे आवाज । पावसाचा ।।६।।

दुथडी न्हावू दे । धरणी धरण
गाईन भजन । तेव्हाच रे ।।७।।

           ✒अनिल सा.राऊत
            📱9890884228

लावणी-मिठीत की हो वढलं

::::::: लावणी-मिठीत की हो वढलं :::::::

काल राती आकरीत घडलं
नगं नगं ते सपान पडलं
अहो राया तुमी
खस्सकन मिठीत की हो वढलं।।धृ।।

नाच नाचुनि..दमुनि भागूनि झोपले होते गाढ
कडी घालण्या उठले इत्क्यात आला तुम्ही द्वाड
बाह्या सारुन..डोळा मारुन
गप्पकन दार की हो लावलं...।।१।।

गालात हसुनि..तालात बसुनि डाव असा टाकला
लाजून तुम्हा बाई हा मुखडा चांदाचा झाकला
गिराण सुटण्या...चंद्र देखण्या
झप्पकन हात की हो धरलं..।।२।।

डोळ्यात बघुनि..हुरद्यात शिरुनि राजी केलं मला
कुठून कशी वं सांगा राया अवगत केली कला
काळीज देऊन..काळीज घेऊन
टच्चकन डाळिंब की हो फोडलं।।३।।

लाज लाजूनि...चूर होऊनि मोहरुन गेले बाई
लव अंगावरी ऊभी राहिली शहारुन गेले बाई
ढग बरसुनि..गेले निघूनि
लख्खकन चांदणं की हो पडलं..।।४।।

          ©अनिल सा.राऊत
          📱9890884228

लावणी-जीव टांगणी लावू नका

%%%% लावणी-जीव टांगणी लावू नका %%%%
____________________________
ऐन सांजेची वेळ...ऊरात उठली कळ
ह्ये दुखणं हाय भारी
हलक्यावरी घेऊ नका...
जीव टांगणी लावू नका
सख्या,या ना उशीर लावू नका।।धृ।।

नऊवारी साडी नेसून भारी
ऊभी केव्हाची बाई मी दारी
शृंगार सारा जाईल वाया
उगीच भाव खाऊ नका...
जीव टांगणी लावू नका
सख्या,या ना उशीर लावू नका।।१।।

अंबाड्यावर चढविला गजरा
कुणा-कुणाच्या रोखू नजरा
जीव जडला तुम्हावरी
तोंड फिरवूनि जाऊ नका...
जीव टांगणी लावू नका
सख्या,या ना उशीर लावू नका।।२।।

शेज सजवली जाई जुईनी
या सत्वरी घाई करुनी
अंग अंग मोहरुन येता
अंत ज्वानीचा पाहू नका...
जीव टांगणी लावू नका
सख्या,या ना उशीर लावू नका।।३।।

       ©अनिल सा.राऊत
       📱 9890884228

अभंग

::::::::/:::: अभंग ::::/:::::::

ये आता तू दारी।मागावया दाणे
घाल लोटांगणे।सरकारा।।

पिकविले आम्ही।पोटापुरते या
नको पडू पाया।द्या म्हणूनि।।

भाव बारा आणे।होता दिला जेव्हा
दात कण्या तेव्हा।केल्या आम्ही।।

कुणी लटकले।कुणी विष प्याले
नाही आली दया।तेव्हाच का।।

आज दुष्काळाने।घडवली एकी
मिटवली बेकी।सालासाठी।।

उजाड ही राने।सारीच आता रे
पोट भुकेले रे।सुटलेले।।

सांग आता तया।माग दारी भीक
फॅक्टरी ती विक।दाण्यापायी।।

वाटा कैक हाती।धोरण पांगळे
डसती मुंगळे।आयातीचे।।

पोटचे मरु दे।जगो सवतीचे
तख्त हे सत्तेचे।नको जाया।।

          ✒ अनिल सा.राऊत
           📱9890884228

लावणी - देखणं पाखरु

:::::: लावणी ::::::

रंगपंचमीचा सण बाई,आलंया उधान
बावरला गं साजन..काय मी करु
साडी चोळी झाली ओली,गार गार त्यानं केली
गालावर आली लाली,कसं मी करु....

एकटी मी नार त्याच्या नजरेत गं भरले
अडवुनि एकांती मिठीत हळूच धरले
सोडवुनी घेता अशी,पडले पुरती फशी
केली माझी दैना,कशी सावरु...
नका नेवू दूरदेशी,मी देखणं गं पाखरु...।।१।।

कोरस:
[ लई नका जवळी,जाऊ अशा अवेळी
नार बघा लाजरी,पाव्हणं,तुम्हा भुलणार नाही तशी
कैक गेले वाऱ्यावरी,कैक हिमगिरी
जीव जडला असला तरी
नका नेवू दूरदेशी,हे देखणं पाखरु...]

रंग गोरा सोळा साज,किती घायाळ केल्या मी नजरा
केवड्याच्या सुगंधाचा,नागिणीवानी माळला गजरा
ध्यास माझा,साऱ्या नागा,कुणाला मी नाही मिळायची
सोडा नाद नको वाद,राणी हाय मी माझ्या राजाची

सांगू किती या खुळ्यांना,नाद माझा ज्यांना
आरसपानी रुपकळ्यांनी,वेड लावले त्यांना
सांगू कशी मी कुणाला,आलं आदन ज्वानीला
कळेना बाई मला कशी आवरु...
नका नेवू दूरदेशी,मी देखणं गं पाखरु...।।२।।

कोरस:
[ लई नका जवळी,जाऊ अशा अवेळी
नार बघा लाजरी,पाव्हणं,तुम्हा भुलणार नाही तशी
कैक गेले वाऱ्यावरी,कैक हिमगिरी
जीव जडला असला तरी
नका नेवू दूरदेशी,हे देखणं पाखरु...]

अंग माझं जणू आग,तुम्ही प्रेमाने भिजवा जरा
कुरवाळा हळू न्याहाळा,मुखडा मुलखाचा लाजरा
कोर न्यारी,धनुष्याची,मी कोरीन तुमच्या गालावरी
नका होऊ बेभान साजना,धीर धरा थोडातरी

राखली मी पाटी कोरी,या दिलाची तुम्हापाई
भेटताच तुम्हा बाई,आता झाली मला घाई
तरी नका लावू हात,आधीच होईल घात
लाखमोलाची हाय माझी आबरु...
नका नेवू दूरदेशी,मी देखणं गं पाखरू...।।३।।

कोरस:
[ लई नका जवळी,जाऊ अशा अवेळी
नार बघा लाजरी,पाव्हणं,तुम्हा भुलणार नाही तशी
कैक गेले वाऱ्यावरी,कैक हिमगिरी
जीव जडला असला तरी
नका नेवू दूरदेशी,हे देखणं पाखरु...]

(स्ट्रक्चर- मला जाऊ द्या ना घरी,आता वाजले की बारा)

© अनिल सा.राऊत
📱9890884228

कातरवेळ

:÷:÷:÷:÷:÷ ....कातरवेळ :÷:÷:÷:÷:
....................................................

दिले वचन येण्याचे
उलटून जाते वेळ
तिच्या प्रतीक्षेत अशी
सरते कातरवेळ...

येते जेव्हा लवकरी
अबोल्याचा चाले खेळ
ओठांतुनी अलगद
झरते कातरवेळ...!


डोळे उभे वाटेवरी
माय येण्याची ही वेळ
ना दिसता...जीवघेणी
ठरते कातरवेळ...

सूर्य झिरपता रानी
लागे भाकरीचा मेळ
माय होते ओली ओली
भिजते कातरवेळ...!

जाता झाला माझा बाप
ती ही होती हीच वेळ
आजही नयनडोह
भरते कातरवेळ...

तुझी उणिव भासता
विसरतो काळवेळ
बापा,तुझ्या पाठीमागे
छळते कातरवेळ...!

लांबत जाता सावल्या
बिलगते सांजवेळ
दुरावलेल्या हातांना
स्मरते कातरवेळ...

स्फुंदते आतुनी झाड
कोमेजते जेव्हा वेल
ओल्या हळूच पापण्या
करते कातरवेळ...!

© अनिल सा.राऊत
             📱 9890884228

टाहो

_________ टाहो __________
÷÷÷÷÷÷÷÷÷÷÷÷÷÷÷÷÷÷÷

सरकारचे लक्ष सध्या उद्योग उभारणीकडे लागलेले आहे.त्यात वाईट असे काहीच नाही पण शेती आणि शेतकऱ्यांकडे जे दुर्लक्ष होतेय ते नक्कीच योग्य नाही.यावर प्रकाश टाकणारी ही कविता...
             * अनिल सा.राऊत *
             📱9890884228
       ________________________

माणसासारखी माणसं
चालवतात सरकार
दुष्काळाची त्यांना
नाही कसलीच दरकार...
हो व्यापारी आता धन्या तू
अन् पोट भर....
कर बाबा कर तू
खुशाल उद्योग उभा कर!...१

आम्ही मुकी जित्राबं जरी
तुझं हाल बघून गहिवरतो
'ह्ये सरकारा,बघ इकडं..!'
म्हणत आम्ही हंबरतो...
भूक नसतेच हंबरण्यात
तू उगीचच काळजी ना कर...
कर बाबा कर तू
खुशाल उद्योग उभा कर!....२

पाऊस-पाणी होतं तोवर
घातलंच की तू पोटभरुन
हाय जाणिव आम्हाला ही
बघ,ह्ये डोळंही आलं भरुन..
इकून टाक एखादा तुकडा
अन् बाहूत बळ भर...
कर बाबा कर तू
खुशाल उद्योग उभा कर!...३

पडलाच जर 'स्टार्ट अपला'
पैका तुला कमी धन्या
आम्ही कधी उपयोगी पडणार?
दे निरोप आम्हाला धन्या..
ऊठ गड्या ऊठ आता
'मुद्रा'चा तू अर्ज भर...
कर बाबा कर तू
खुशाल उद्योग उभा कर!...४

शेतीला तुझ्या,नाही मिळालं
कधी वेळंवर वीज-पाणी
सरकारही करतंय आता
उद्योगवाल्यांचीच भांडी-धूणी
हो शहाणा अन्
हा आतबट्ट्याचा धंदा बंद कर..
कर बाबा कर तू
खुशाल उद्योग उभा कर!...५

माणसांचा टाहो
माणसांना ऐकू जात नाही
दूष्काळनिधी मिळेपर्यंत
आम्ही काही खात नाही...
धन्या,तू मात्र...
फासाची आस ना धर..
कर बाबा कर तू
खुशाल उद्योग उभा कर!...६

              * अनिल सा.राऊत *
             📱9890884228

बाप नि माय

_____ बाप नि माय _____
÷÷÷÷÷÷÷÷÷÷÷÷

बाप संसाराचे खुरपे
माय खुरप्याची झिजणी
एक उसवते भूईला
एक सोसते टोचणी...

बाप उसवता मातीला
माय पेरते कहाणी
धीर मुठीचा नको सैल
नि माय होते मायनी...

बाप जागता डोळा
माय डोळ्याची पापणी
बाप रचितो सपान
माय साकारते रानी...

बाप घामाचा सागर
माय नदीचं पाणी
दो देहात एक जीव
अशी अतूट कहानी!


         * अनिल सा.राऊत *
         📱9890884228
                  ( गारवामधून )
÷÷÷÷÷÷÷÷÷÷÷÷÷÷÷÷÷÷÷÷÷

विठ्ठला...

_____ विठ्ठला... _____
÷÷÷÷÷÷÷÷÷÷÷÷

शुष्क
वाळवंटातून
अनवाणी
चालताना
पायांना
जाणवते
दुष्काळाची
भीषणता...
विठ्ठला,
थोडा वेळ
ये खाली
विटेवरुन...
किती युगे
पाहणार आहेस
पुंडलिकाचीच
मातृभक्ती?
फक्त
दोनच मिनिटे
बघ मातृसेवा
या बळीची
अन्
तूच सांग-
त्याच्यासाठी
किती युगे
भरशील विहीरी?

         * अनिल सा.राऊत *
         📱9890884228
                  ( गारवामधून )
÷÷÷÷÷÷÷÷÷÷÷÷÷÷÷÷÷÷÷÷÷

मी एकलाच इथे!

:÷:÷:÷:÷:÷ मी एकलाच इथे :÷:÷:÷:÷:

जमला सारा गोतावळा,मी एकलाच इथे
चाललो दूर प्रवासाला..मी एकलाच इथे!

लुटलो किती?कुणासाठी?हिशोब ना केला
तरीही पुरुन उरलो,मी एकलाच इथे!

दुबळे होते हात माझे,घेण्या कुणाचे काही
दातृत्वात आघाडीवर मी एकलाच इथे!

रडू नका लबाडांनो आज धाय मोकलून
ते सत्य तुमचे जाणतो..मी एकलाच इथे!

त्या अश्रुंचेही ऋण करणार वसूल तुम्ही
तरीही नाते निभावतो,मी एकलाच इथे!

उरका पटपट अन् व्हा मोकळे जेवाया
दूर एकांती जळणार,मी एकलाच इथे!

कमवली दौलत ज्यांनी त्यांचाच तुम्हा लळा
कवित्वाने धनवान,तो मी एकलाच इथे!

            © अनिल सा.राऊत
             📱 9890884228

...काळीज माझे

:÷:÷:÷:÷:÷ ....काळीज माझे :÷:÷:÷:÷:
______________________________

मंजुघोषा:- गालगागा गालगागा गालगागा
....................................................

वाटते का कोडगे काळीज माझे?
हाय..!टाहो फोडते काळीज माझे!

झाकल्या त्या वेदना हास्यात जेव्हा
पापणी ओलावते काळीज माझे!

का दिखावा मांडती हे लोक सारे?
दान ते लाथाडते काळीज माझे!

दु:ख येता चोरट्याने रोज दारी
कैदखानी डांबते काळीज माझे!

पाहताना दोन जीवांची जुदाई
आजही पाणावते काळीज माझे!

            © अनिल सा.राऊत
             📱 9890884228

धावुनि तू ये ना...

विरहगीत
_______________________

धावुनि तू ये ना...
_______________________

चित्त नाही थाऱ्यावर...सैरभैर वाऱ्यावर
कुठेच जीवा चैन पडेना?
का अजूनही दूर तू मैना...
   ये ना..ये ना..ये ना सजणी,धावुनि तू ये ना।।धृ।।

फुलून आली बाग जरी
काळजात ही आग तरी
ओतले मी आसवांचे पाणी
काही केल्या विझेना....
       ये ना..ये ना..ये ना सजणी,धावुनि तू ये ना।।१।।

मी एकलाच गातो विराणी
तुझ्या आठवणींची गाणी
सांग किती साद घालू तुला
चैन जीवाला पडेना...
        ये ना..ये ना..ये ना सजणी,धावुनि तू ये ना।।२।।

आतूर मन हे तुला भेटण्या
गुपित ओठांचे तुला सांगण्या
नसता तू जवळी या समयाला
क्षण सरता सरेना...
         ये ना..ये ना..ये ना सजणी,धावुनि तू ये ना।।३।।

होतो कानी भास पैंजणाचा
झाला किती भार यौवनाचा
मिलनास उताविळ जीव वेडा
प्रेमात न्हावू दे ना...
        ये ना..ये ना..ये ना सजणी,धावुनि तू ये ना।।४।।

का अजूनही दूर तू मैना...
   ये ना..ये ना..ये ना सजणी,धावुनि तू ये ना....

          ©अनिल सा.राऊत
         📱9890884228

सावित्री-माझ्या नजरेतून

____ सावित्री-माझ्या नजरेतून ____
÷÷÷÷÷÷÷÷÷÷÷÷÷÷÷÷÷÷÷÷÷÷

माझ्या
' व्हॉट इज धिस?' प्रश्नाला
तिचं फक्त
डोळे विस्फारुन पाहणं
सहन केलं असतं का मी-
.... आजच्या वैज्ञानिक युगात?
अन्
तिनं चूल सोडली म्हणून
राहिलोय का कधी मी उपाशी?

सावित्री,
या दोन्ही प्रश्नांचे उत्तर
'नाही' हेच येतेय...

होय सावित्री,
तूच झालीस सेतू....
ज्ञान अन् अज्ञानाच्या दरीमधील...
म्हणूनच आज
तिची नजर
झुकत नाही पहिल्यासारखी-
माझ्या प्रश्नाला उत्तर देताना...
किंवा
घाबरतही नाही ती
कर्तव्यासाठी
चूलीला लाथ मारताना!

* अनिल सा.राऊत *
         📱9890884228
                  ( गारवामधून )
÷÷÷÷÷÷÷÷÷÷÷÷÷÷÷÷÷÷÷÷÷